50 ఏళ్ల భూ సమస్యకు పరిష్కారం.. 1,301 మంది రైతులకు సీఎం చంద్రబాబు భరోసా!

ప్రకాశం జిల్లా కొండపి నియోజకవర్గంలోని గర్భకండ్రిక భూముల సమస్య పరిష్కారానికి ముఖ్యమంత్రి చంద్రబాబు నాయుడు కీలక చర్యలు చేపట్టారు. దశాబ్దాలుగా భూములపై హక్కుల కోసం ఎదురుచూస్తున్న రైతులకు ఊరట కల్పించే దిశగా నిర్ణయం తీసుకున్నారు. కొండపిలోని నర్సింగోలులో ఎనిమిది గ్రామాల రైతులతో సమావేశమైన సీఎం, వారి సమస్యలను నేరుగా తెలుసుకుని పరిష్కారానికి చొరవ చూపించారు.

ఈ నిర్ణయంతో కొండపి, జరుగుమిల్లి, నాగులుప్పలపాడు, సింగరాయకొండ మండలాల్లోని ఎనిమిది గ్రామాలకు చెందిన 1,301 మంది రైతులకు ప్రయోజనం చేకూరనుంది. మొత్తం 2,915.10 ఎకరాల భూములకు సంబంధించిన సమస్యను పరిష్కరించి, రైతులకు భూములపై హక్కులు కల్పించేలా పట్టాల జారీకి చర్యలు చేపట్టనున్నారు.

ఏళ్ల తరబడి తమ భూములపై స్పష్టమైన హక్కుల కోసం ఎదురుచూస్తున్న రైతులకు ఈ పరిణామం ఆశాజనకంగా మారింది. తమ ఇబ్బందులను స్వయంగా విని పరిష్కారానికి ముందడుగు వేసిన ముఖ్యమంత్రి చంద్రబాబు నాయుడుకు రైతులు కృతజ్ఞతలు తెలిపారు.

రైతుల భూ సమస్యలకు శాశ్వత పరిష్కారం లభించి, పట్టాలు జారీ ప్రక్రియ పూర్తయితే అనేక కుటుంబాలకు భద్రత చేకూరనుంది. గర్భకండ్రిక భూముల వ్యవహారంలో ప్రభుత్వం తీసుకున్న ఈ నిర్ణయం ప్రకాశం జిల్లా రైతుల్లో కొత్త ఆశలు నింపుతోంది.